[荒誕劇] 巴士站

李華川

荒誕短劇



巴士站



李華川





人物：男士

            師奶



時間：早上八時左右



場景：舞台中央擺放一巴士站牌





﹝男士和師奶正在等巴士﹞



男士    巴士加價啦，正常吖。  

師奶    正常？我話一啲都唔正常。

男士    我地最低工資加咗啦。

師奶     但我老公冇加到家用呢。

男士     正常吖！樣樣都加價，加咗人工抵番條數。

師奶     冇法啦，以前兩餸一湯，依家唯有一餸一湯。

男士     乜架巴士咁耐都未嚟架？

師奶      加咗價重少咗巴士，有冇搞錯？

男士      佢地話環保喎，開少一架巴士一來唔使咁多汽油，

               二來唔使噴出咁多煙，污染城市。

師奶      你講哂啦！我冇嘢講。



              ﹝二十分鐘過去﹞



師奶     離哂譜，咁耐都冇車嚟。

男士    我返九點，唔怕。



            ﹝二十分鐘過去﹞



男士     離哂譜，咁耐都冇車嚟。

師奶    我唔趕時間，唔怕。

男士    我趕時間呢，就快九點啦。﹝看手錶﹞

師奶    咁趕時間咪搭的士囉。

男士    本來時間係好鬆嘅，冇巴士嚟害到我依家咁。

師奶    你有冇留意，呢條路唔覺有的士行噃。

男士    慘啦！重有十分鐘就九點，依家重係等緊車。



           ﹝樓上有人擲汽水罐﹞



男士      嘩！咁冇公德心架，攞命咩？



             ﹝樓上有人擲幾個一蚊銀仔﹞



師奶      有人擲錢呀。

男士      啲人黐線嘅，有本事擲一千蚊落嚟吖，笨！

師奶     係呀，擲啦笨 ?



               (樓上有人擲一疊一千蚊落嚟 )   

               (有二十架的士駛埋嚟，的士司機衝落車執錢，唔夠

                三十秒的士司機上車走哂 )



男士      喂喂...............啲車走哂,冇車啦。

師奶      我有辦法叫啲的士番嚟。

         

                  (師奶大聲叫:  有錢執呀..........)



男士      嘩!  果然嚟咗二十架的士。

師奶      不過佢哋知道係流料又開走哂呢。

男士      唯有行路返工啦。

師奶     我都係行去街市好啲。



              (一架巴士開到，見巴士站冇人，又開走..........)