黐線武俠小說(卷五)

李華川

黐線武俠小說



李華川



   作者有話講 :



黐線武俠小說已寫到卷四，各位睇完好似重未入局，唔係，已開始入局了，講到文林怪客嘅
老婆嚟咗，想繼續講，點知畀個街坊疾住，講古佬海無涯問:  咩事?  街坊話點解文林怪客無端端嚟一間客棧? 點解劍王劍聖無端端打起嚟?你都未講前因後果。
海無涯話: 唔關我事架，李華川篇小說係咁寫，我依書直說啫。不過作者有段文字講咗前因，
冇講後果，依家講番(唉! 想偷雞唔講都唔得)，李華川寫嘅前因係咁嘅......................
後來故事發展越嚟越黐線，冷嘲熱諷，引古諷今，乜都玩哂，玩到盡。






      呢個係咩時代   係立立亂嘅時代   係烏煙瘴氣嘅時代   係發雞瘟嘅時代   係冇大冇細嘅時代   係唔清唔楚 嘅時代

      我收到天水劍堡堡主密令   要我監視堡內三個不俏徒   佢地係西門吹水   西門吹風同西門吹雨   三個人係兄弟   五年前偷咗堡主嘅天水刀譜   粒聲唔出逃出天水劍堡   喺外邊仲創立咗個西門刀莊   自立門戶   自己坐大   不可一世   仲以為自己係江湖大佬  嘩！咁都得﹝眉批：武俠小說都是這樣的，出現一些反派人物，故事才可說下去。﹞天水劍堡主只係請我去監視佢地三兄弟   有咩風吹草動就向佢回報   等佢搵個機會清理門戶咁喎

      我又唔明   天水劍堡以劍出名   點解又有本刀譜被偷﹝眉批：不知道嗎？有矛盾才有故事﹞

      唔好意思   講咗咁耐   我仲未介紹自己   我就係 文林怪客 ﹝眉批：你賣廣告？﹞係堡主嘅客人   我唔識功夫   凈係識絕頂輕功   係個詩人   喺文林同武林走嚟走去   揸住支筆穿梭文林同武林之間   吟下詩   寫下野史咁啫   仲識番幾個詩人同劍客   例如江湖三劍   佢地係劍王一陣風   劍聖一陣雨  同埋劍仙李白   

      講開又講   唔知點解   劍王一陣風同劍聖一陣雨忽然大家唔啱   發生意見   仲約定決鬥   喺無名村一個山坡上對陣決鬥   兩個都係好朋友   忽然成為敵對   為咩   冇人知   但係佢兩個嘅決鬥   搞到個場面好墟冚.....................

        

                                                                                                                    



卷五   舉起酒杯話題多  





　　藍宇天客嘅輕功 可以佢認第一    冇人敢認第二    因為唔單止可周天飛 而且更加可以喺時空穿梭    巴閉極



    一日    藍字天客收到文林怪客嘅衣貓    叫盡速飛往無名鎮 話嗰度有嘢睇喎



　    去到然後先知道兩個天下第一嘅劍手一陣風同一陣雨喺無名村決鬥    嘩不得了   呢兩位當今大高手過招   肯定精彩绝倫   嚡   點知趕到去見到佢地淨係紥馬   手中有劍 一個劍尖指天 一個劍尖篤地   但一直都唔發招   真係悶死人   唯有拉埋文林怪客去一間客棧飲番杯冰凍啤酒 解下悶



我地去到一間客棧   老闆算日先生聽話要飲啤酒   佢都唔知乜嘢嚟    於是我就「雪」一聲立刻飛到去二十一世紀 好似嗰個李連杰咁   一隻拎住幾支啤酒帶返去一間客棧   大家正在杯上杯落之際   劍仙李白嚟到   於是大家再飲個痛快



我地三條酒鬼 一路飲 一路當然話題多多    除咗最Hit 嘅兩大高手決鬥呢個話題    當然是講下西門刀莊嗰三個 死鬼西門吹雪嘅不肖新世代   西門吹水    西門吹風 同埋西門吹雨   佢地偷咗天水劍堡嘅《天水刀譜》   搞到學人另立門戶 可謂不知天高地厚



(講起佢地三兄弟嘅功夫 就認真犀利    嗰個西門吹水 無論係清水濁水 以至荷蘭水   畀佢一吹   即刻化為犀利武器    嗰個西門吹風 就更加犀利   佢求其吹一口氣   就颳起八號風球咁大嘅風   問你怕未   重有嗰個西門吹雨   佢一吹起嚟 立刻就有 黃雨紅雨藍雨黑雨   總之乜雨都出齊   更加厲害)



忽然之間 算日先生個伙記仔話   文林怪客嘅太座何東施駕到   大家不約而同 幾乎將口中啤酒噴出   文林怪客更加手震震添   佢問佢老婆 點解你又出嚟   何東施話   你個衰佬   無名鎮有嘢睇都唔預埋我   我自己唔會嚟咩



(好講到呢度   要叉開一筆   介紹下文林怪客個太座   佢的確係大有來頭   佢個老豆何馬口   平日就冇乜特別   但最厲害嘅就佢把口 擘大之後   就連大笨象都吞咗落肚   而何東施呢   佢有一個絕招   亦係只有一招十分了得嘅功夫   叫做「河東獅子吼 」聽講話連宋朝嗰個蘇東坡大學士都怕怕 你話如果佢一出招 點到文林怪客唔面青)

既然東施阿嫂都出咗嚟    我地就叫她一齊飲埋一份    點知飲飲下文林怪客忽然大叫一聲   佢老婆問佢做乜   佢話漏低咗一本好緊要嘅記事簿    裏面記載咗指天篤地劍法    啲資料好重要   要返去天水劍堡攞出來   先至可以記錄劍王同劍聖嘅「世紀之戰」咁話    所以要先行開幾日   講完就立即走咗去    何東施當然奈佢唔何   因為佢嘅輕功了得   明知追唔到佢   唯有繼續留喺一間客棧飲啤酒啦



藍宇天客都覺得好奇   怪客素來記性好 點解會帶漏嘢    於是詐假意話去茅廁小解   天客一出客棧 立即運起輕功 一直跟住文林怪客    吓    佢原來唔係返去天水劍堡   而係轉咗彎向住無名山頂奔去   去到山頂一間屋仔   原來有個靚女已經喺度迎接佢    睇佢兩個嘅情形    都幾煙靭噃



吓   文林怪客個衰鬼吖  都算夠膽嘞   靜靜雞收埋個女仔   唔單止呃咗何東施   連同佢幾十年老友鬼鬼都畀佢呃埋   怪唔得知佢年年都約埋我地嚟一間客棧啦



藍宇天客正想靜雞雞匿埋   睇下佢地搞乜鬼   點知就畀怪客發覺   佢叫我唔好爆出嚟   當然   天客 同怪客係份屬 老友   就姑且同佢冚住先   後來佢叫我返天水劍堡 同佢求其攞一本簿   用來呃下阿嫂咪得囉   我話咁又係喎    於是立即飛返去天水劍堡.............個故事就咁發展落去............





                                                                                                       ﹝待續﹞