用户
 找回密碼
 註冊

Login

使用facebook注冊/登錄

  • QQ空間
  • 回覆
  • 收藏

[亂UP廿四] 「人不可以貌相」

字體大小: 正常 放大
CSC 幼苗筆手 2013-5-15 21:09:28 灘主

馬上註冊,結交更多好友,享用更多功能,讓你輕鬆玩轉社區。

您需要 登錄 才可以下載或查看,沒有帳號?註冊

x
本文章最後由 CSC 於 2013-5-15 21:19 編輯

大家好,咁我今日想同大家分享「人不可以貌相」依個題目。
講依個話題之前,想問下大家信唔信 睇相 嫁呢?
講真,睇相有冇咩根據我唔知,但係我會估,可能嘴角向上嘅人係鐘意笑嫁,er...可能眼角向上嘅人,就俾人話妖(艷)啦,可能係做第三者呀,勾人老公個啲啦,但係有啲人又會話,佢地應該係喊得多,成日抹眼淚先會係咁,咁講真...事實又唔衝突嘅,男人通常都係鐘意嗰啲楚楚可憐嘅女人架,咁你又話得佢係狐狸精咁即係件事穿左煲啦,咁佢喊,喊到隻眼歪咗都唔出奇,咁...除非佢覺得無問題、厚面皮,哎!講到厚面皮,咁面皮厚嘅人又係唔係真係冇感覺、唔知衰嘅呢,又有可能喎,冇感情嘅人,即係冇乜表情啦,咁冇面部表情就自然缺乏運動,咁就燃燒唔到脂肪,最後就導致肥胖丫,係咪?

又有啲睇相(嘅人)佬又話咩眉粗就鹹濕(淫穢),話眉彎就感情用事,唔知真唔真啦,又有人覺得門牙生得長呀、突出就好多野講,依個又可以易啲理解喎,點解呀?因為講得多野嘅人,舌頭嘅郁動次數係比冇咁鐘意講野嘅人多嫁,自然就頂隻牙出啲啦,又有人話嗰啲人唔係超鐘意講野呢,就係好少講野,就係因為上下兩排牙合實,唔比自己講,啲人就「emmm...」咁講野加嘛,係咪?咁呀...再加上而家嘅醫學咁昌明,有整容嘅服務,哎!小心呀,我都講錯野呀,個啲唔係叫整容,係叫醫學美容,有咩分別呀?醫學美容文雅啲囉,多咗「醫學」兩個字囉,咁點解唔叫「醫學整容」?因為客人會強調,我塊面都有真野,唔係全部整(假)加嘛,「醫學」加黎做咩呀,好簡單啦,尊重醫學界囉。

咁各位,大家仲點可以以貌取人呢?人地個樣係咪真你都唔知,如果你話緊人地塊假面,人地俾你一路話一路笑呀,咁相反,各位男士女士,你要搵個男女朋友,搵個俊男美女又有冇用呢,個男嘅好靚仔,但係又吸煙又飲酒,成日講大話出去黏花野草,依啲「靚仔」襟睇(耐看)極有限啦。靚女又點呀,你見個睇落幾端莊嘅女仔,講野尖聲細語,咁又點呀,有冇聽過詩詩文文、幾溫柔嘅粗口丫?唔係講笑,有啲女仔真係好抵死,好似撒野咁樣話「X你呀!」,你真係唔識點比反應佢,尤其是你第一次聽佢咁話,你好難反應過黎家嘛,人地又係靚女,拒絕佢又唔好意思,又對自己唔住,接受佢,跟住佢就會同你講其實係鬧緊你,仲醒你一巴,俾人話又好似唔知醜咁,仲咁hurt,你話幾樣衰。

我唔係話唔睇樣,咁人係真係有表面加嘛,女士就明啦,揀個好似成熟啲,點知扮豬食老虎嘅,係咪?
人嘅樣係要黎睇嘅,不過睇唔到人地嘅內在修養、品行,你點睇啫,人地又唔係透明,你對眼又唔係照到X光嗰啲,就算係呀,你頂多咪睇到人地有冇腫瘤,你睇得啲咩啫,比你望埋個腦都係唔知人地諗咩嘅,咁就白望啦。

「人不可以貌相」係指你係唔可以淨係靠對眼,就知道晒人地諗咩,盲人好明白丫,因為盲人唔係靠對眼加嘛,咁盲人冇朋友ga?梗係唔係啦,人係要用個心去識人加嘛。係,有時你對人真心,人地未必都係咁,咁至少你都有少少識得分哇,所以各位,唔好再淨係識講咩「要帶眼識人」喇,帶眼係唔夠架,要帶埋個心,帶埋個腦先有用加嘛,咁我奉勸大家唔好再帶眼識人喇,呀唔係,講錯左,係唔好再以貌取人喇,多謝!





本文章最後由 CSC 於 2013-5-16 21:07 編輯

容許我用口語作一個嘗試^^~
發新帖
發表評論
您需要登錄後才可以回帖 登錄 | 註冊