用户
 找回密碼
 註冊

Login

使用facebook注冊/登錄

  • QQ空間
  • 回覆
  • 收藏

[字花] 2014年5月 《字花》第四十九期‧你講乜話

字體大小: 正常 放大
心雪 超級版主 2014-5-31 23:38:43 灘主

馬上註冊,結交更多好友,享用更多功能,讓你輕鬆玩轉社區。

您需要 登錄 才可以下載或查看,沒有帳號?註冊

x
本帖最後由 心雪 於 2014-7-14 02:07 編輯

fl_49.00.jpg

【49期字花 · 你講乜話】





【49期字花 ・ 你講乜話 ・ 識睇一定睇啟首語】

〈識睇嘅一定係讀住嚟睇〉
/ NH先生

一月以嚟,有關粵語嘅論爭就幾乎冇停過。你有你話普教中乜嘢問題都冇,呢邊又即刻有人駁咁樣係漠視粵語嘅重要性,隨之而來嘅係一連串嘅粵語捍衛運動,強調粵語唔要畀人「矮化」,更唔應該成為「驚心動魄」嘅妖魔語言。一時之間,好似去到人人都話粵語好嘅地步,但講真嗰句,對於呢個我哋咁愛甚至話要努力守衛嘅語言,我哋認識又有幾深?當然,呢個並不單單係對讀者嘅提問,亦都係我哋《字花》編輯積極反思嘅問題。於是我哋決定好好咁做一個粵語專題。(由粵語論爭引發嘅語言政治問題,可以參考第58至75頁嘅評論專題。)

當然,作為一本文學雜誌,呢個粵語專題並唔單單淨係同大家講下粵語嘅源流(例如同楚方言有幾大關係),又或者從語法層面同你講下粵語同普通話相比,點樣詞序顛倒,點樣慣用單音節詞,以至好鬼多前綴後綴等等……而係,想同大家呈現究竟文學性地用粵語寫作,到底會產生出一種點樣嘅美學效果?或者再準確啲咁講,究竟粵語以唔同嘅面貌呈現喺唔同嘅文體時,佢到底表現出點樣嘅活力、彈性,甚至一種無可取代嘅獨特性呢?

實情粵語寫作亦唔係咩今時今日先喺石頭度爆出嚟嘅新概念,而喺粵語寫作嘅傳統裡面,至少有幾種文體值得我哋特別關注:第一種係夾雜咗文言、書面語同粵語口語嘅「三及弟」小說;第二種係傳教士向廣州話取經寫成嘅《聖經》;第三種係半文半白,並且多用南音或清歌形式說唱嘅粵謳。呢三種文體都有佢哋特定嘅生成背景,更重要嘅係,佢哋都表現咗粵語寫作裡面「講」同「寫」互為影響又互相滲透嘅特殊面向。所以係專題嘅第一部分「偷龍傳鳳」中,我哋特意請咗阿修、飲江同陳麗娟去仿作「三及弟」小說、粵語聖經同粵謳,睇下幾個作家點樣係既有嘅文體中傾注新嘅話題、新嘅思考。而呢部分嘅最後一篇,黃念欣嘅〈懷鄉音——一個教書女子的尤里西斯〉,齋睇題目或者你心裡面會彈出「仿作黃碧雲」五隻大字,但當你睇落去,你唔會搵到「烈佬」嘅影子,相反喺一種NY特有嘅風格……我姑且稱之為NY體吧,而重要嘅係,呢篇文係一個愛粵語、研究粵語,希望大家愛粵語而且用心學習粵語嘅教書女子,佢喺思考粵語寫作時最真切嘅發問:「有乜嘢比語言嘅聲音更重要?


的而且確,點講都離唔開聲音呢個話題,就好似第二部分「甩皮甩骨」,同樣離唔開文字同聲音嘅對譯關係:例如智海同邵家臻就搜羅咗一啲粵語嘅熟語、潮語,並配合時下嘅社會議題去重新詮釋呢啲粵語詞彙,各自編造咗一份新嘅新粵辭典;接住嘅係三則「有味」極短篇,三個作者大玩雙關、歇後語,展現粵語粗俗「鹹趣」嘅一面;另一方面,淮遠、周漢輝同廖偉棠就借助一啲一般人平時會講但唔會寫嘅古語詞,發揮聯想,去講古、去玩文字遊戲、去諷刺時弊,佢哋各種嘅嘗試,正正係方方面面咁話畀讀者聽粵語入詩嘅趣味同可能。

而喺最後一部分「雞同鴨講」,唐睿嘅〈Hi, Dad〉、林蔚昀嘅〈細蓉之煙士披里純〉同許迪鏘嘅粵語教材解說文章,牽涉到語域同語言運用嘅斑駁交錯。〈Hi, Dad〉寫嘅係家,阿爸客家話混粵語,阿女中英夾雜,工人Ana講唔鹹唔淡廣東話,坐埋一齊,各有各講。如果話語言不單單係「講嘢」,仲包含咗人嘅身分認同,情感嘅依據,咁喺呢個語言摎咁攪嘅城市,我哋嘅身分、情感甚至「根」又應該從邊到講起?相對嚟講,台灣作家林蔚昀嘅觀察角度就完全唔同。表面上佢寫嘅係一條街,一碗雲吞麵,但實際上講嘅卻係喺另一個語言領域中漫遊、迷路、發現,最終搵到出路嘅詩意感受。而許迪鏘嘅〈你講乜話?〉又將關於粵語嘅討論重新拉返去學校呢個話題嘅起點,佢更自編教材,自行分析,去話畀大家聽用粵語教學點解合情、合理,合晒何車。

關於粵語書寫,講到尾,就係想用文字去「保存」一把聲音。我所講嘅「保存」,並唔係話只係想show畀人睇,原來有啲字、有啲句子係可以咁樣寫落嚟,而係想大家了解,原來當你同我閒來無事或者煞有介事要去表達所思所想嘅時候,無論過程係幾咁迂迴曲折,卻唯有呢把聲先可以令我哋最直接、最精準咁去話畀人聽,哦,咪就係咁樣囉。而呢種自信,其實從來唔需要求諸標語、宣言,而來自於我哋喉嚨發出嘅、由文字建立嘅心照不宣,同時又意料之外嘅無限可能。

*  *  *  *
今期字花於係旺角序言、Kubrick、商務、三聯、中華書局、Page One、樂文、the Bookshop、榆林、田園等書店有得賣。




[目錄有待更新]





發新帖
發表評論
您需要登錄後才可以回帖 登錄 | 註冊